台北1+1之旅 Day 4

以下故事係發生係2007.09.11

Day 4(北投, 西門町, 機場):

行程黎到最後一日, feel到自己體力開始下降, 原先plan好係最後一日先浸溫泉係正確既決定, 朝早起身就pack好晒啲野check-out, 行李就暫時放係酒店, 出發到北投...

坐捷運到新北投站, 到埗後亂行一通揾溫泉, 發覺行錯路後就係間士多食hotdog做早餐. 行番正路, 一眼就睇到露天風呂, 本來想試下露天浸溫泉既感覺, 但係間野實在太簡陋, 所以就走左去間遠少少既溫泉會館, 入去問frontdesk, 俾錢, 奇怪既事就發生啦...

frontdesk: 這裡有兩條鑰匙, 綠色是男的, 紅色是女的, 男更衣室在樓上轉右, @#$%^&*(無聽到).....
t: 你剛才是說一條鑰匙男的, 一條女嗎?
frontdesk: 對, 沒錯, 綠色是男的, 紅色是女的...
t: 我們要女的鑰匙幹什麼??
frontdesk: (望一望)不好意思, 是兩條男的鑰匙...
t & b: (傻笑)...

離開frontdesk後...

t: 佢以為我地邊個係女啊...

浸完溫泉, 人感覺上鬆左, 揹著既野都好似無咁重. 番酒店放低行李, 到西門町食蛋包飽, 買手信, bill兄special order要綠豆糕, 就到港記買, 入到去就有人用廣東話問你要乜野, 十分驚訝, 老闆個樣一睇就睇得出係香港人, 加上銷售方法同速度之快, 感覺自己好似已經番左香港一樣, 買完番酒店pack好哂野就出發, 坐國光到機場, 影下相就同台北說再見了...

寫依次遊記既時間實在太長, 下次真係要考慮再寫唔寫...

台北1+1之旅 Day 3

以下故事係發生係2007.09.10

Day 3(九份, 金瓜石, 台北101, 西門町):

今日會同b分開行, 原因係我前兩日行左好多路, b好似頂我唔順...又因為尋日行得實在太倦, 我成9點先起身(自由行真爽), 9點半就由酒店出發, 今日行程係由台北車站搭火車到瑞芳, 然後搭發生過好多意外既巴士到九份, 行完九份就搭黎既巴士落金瓜石, 完成後搭原車番瑞芳, 約b五點係酒店等, 一齊去101...

到台北車站買火車飛, 成10點幾先火車, 一身電波裝備真係唔想四圍, 留番啲體力行山, 就只好有飲杯黑豆漿就入閘呆坐...=.=, 係等候區見到好多遊客, 日本妹, 幾班香港人, 重有少量大陸人, 香港人好煩, 有幸沿途都同佢地同車, 全程大聲講大聲笑, 完全無視其他人, 佢地既本地導遊都感到無奈...自己坐既係路邊位, 隔離阿叔因為要睏覺張窗簾關了, 無得影相, 只能呆坐車廂中, 大既半小時, 已經到左瑞芳, 係車站內睇睇回程班次時間, 一睇就知自己傻仔左, 買左來回車票, 不就限死左自己要搭邊班車嗎? 平少少但可能得不償過, 好彩今次有4點幾車, 唔會太遲...走到車站外就已經係巴士站, 排著好多人, 大部份都係遊客, 巴士一到, 大家上哂車都要一段時間, 最後巴士擠得滿滿的, 難怪會成日出意外. 巴士搖下搖下到大概11:30, 終於到左啦, 先在觀光亭內影下, 再走入街內亂行, 店舖有好多都好似種未開門...=.=,就先遊一團再返黎吧, 九份給了一種赤柱既感覺, 像近郊既商業區, 另外有好多茶店, 可以對著個九份風景真係好正. 走到入民宿區, 窗口都對著東至東北方, 如果可以係度睇日出就好啦...在寺廟外休息後, 回程路上, 食著魚丸伯仔, 阿柑姨芋圓油蔥棵, 幫b買太陽餅, 自己又買d鳳李酥, 任務完成, 走時只係1:30左右...

坐巴士到金瓜石, 巴士係坐番我由瑞芳黎果條線, 上左巴士, 空位多得很, 因為大家都係九份落...巴士上小插曲, 離開九份數站後, 有個日本遊客按停車掣後揸著本旅遊書問司機野, 司機聽後可能唔明, 擰頭搖手就打發佢走, 日本佬無奈地坐番低, 我見佢咁可憐就問佢去邊, 佢就指左地圖上既九份, 咁我就叫佢快d落車, 因為過左幾個站啦, 我唔知佢聽唔聽得明, 但係佢一家人就真係落左車, 原來佢同太太但埋個B一齊, 山路崎嶇, 希望佢地無事...黎到金瓜石先發覺, 今日黃金博物園唔開, 頂你即刻大叫, 只好周圍睇睇重有咩野好行, 中途被士多阿姨撩傾計, 好吧, 正是本人專長...阿姨又請我食炸麵粉, 我又問下佢重有咩地方好去, 同黃金瀑布點去, 佢就問我有冇揸車, 因為行要2-3個鐘, 沿途重有蛇, 我聽落好似好危險, 只好打消念頭, 坐左一陣, 吹下水, 同阿姨買下野飲, 又問我係咪日本人, 我當然說是香港人, 我邊忽似日本人, 我未受過輻射嫁, 大概2:30, 見有巴士就同阿姨道別, 回瑞芳去了...

在瑞芳車站遇到一班香港女仔排在我後面買飛番台北, 天殺的賣飛佬將我放係3:40既火車上, 當時已經係3:38, 下班車只係4:30, 十分可惡, 就唔可以同下女仔傾下計先既, 要我連問佢地住邊同聯絡方法都無時間問, 就飛蹦到月台上車, 好可惜啊...番到酒店只係4:30, b未番, 我無門口入, 求救於front desk, 佢唔問身份就開門俾我入, 都唔知好彩定唔好彩, 放低野, 行落相機街(hoho), 揾下180, 無現貨好正常, 回酒店b回來了, 就出發上101, 中途share下大家既經歷, b原來釣到個女大學生, 重要合照tim, 非常妒忌, 我就只有阿姨...上到101, 普普通通, 夜景我諗無地方比香港更屈機, 俾多NT100上多兩層(好屈錢), 諗著係露天影唔洗俾玻璃隔著好d, 點知上面d柵欄又高又密, 相機都插唔入, 亂影幾張算, 同feel下91層高度既風力, 當時風都幾大, 加上風吹到柵欄上所發出既聲, 諗番都有d驚驚地...

離開101返酒店放低野, 到西門町掃街, 西門町只係步行距離, 食過阿宗麵線, 同LA比LA既真係垃圾, 台灣既好食好多, 食過鴨肉扁, 同b入去食, 入面只有寫著"麵"和"米粉"既價錢, 各NT50, 後黎叫野食既時候佢地問我地兩排定三排, 我同b都諗一份鴨要切兩排定三排咁仔細??? 就三排啦, 不到3分鐘, 兩碗粉, 三排鴨到了, 我同b都諗食次pk啦, 俾左三大排鴨俾我地, 未食都飽, 我就勉強食左一半, b 食少少就停哂手, 賣單NT400, 兩個傻仔左, 都飽哂, 更成為咁次旅行既烏點, 掃街失敗, 行多陣返酒店睏...

之前同b相討換房既事, 後黎覺得都住得好地地, 換房既事就算...hahaha...懶爆...

End of day 3

Happy Halloween...

台北1+1之旅 Day 2

以下故事係發生係2007.09.09

Day 2(動物園, 深坑, 貓空):

0700起身, 0800準備好, 先到酒店內大堂早餐處探探虛實, 好似唔係太好食, 就打算到街外食早餐, 上好裝備後出發, 出到去先發覺無乜食店係咁早開既, 只好有乜食乜, 揾到間賣水餃既, 坐低就食, 食完起程, 搭捷運到動物園站, 奇怪的是木柵線既列車比較短同埋佢係無人駕駛既, 心諗火燭點算...到站,今日係星期日, 動物園會有好多人...

黎動物園既主要目的, 又點會係影動物呢, 今日既課題係"小朋友", "親子", 同"可憐既動物們"(非常自私), 又要辛苦b陪我行...動物園內係無乜好寫既, 就只看到小朋友既天真同橫蠻而已, post相算...

行左五個鐘終於行完, 本書重寫三個鐘就搞掂, 有啲被騙既感覺, 時間變得緊絀了, 要快快到深坑, 走出動物園, 就揾巴士到深坑, 沿著書所講既巴士揾唔到, 只好係逐個巴士站啲牌揾去到深坑既車, 望著果堆混亂既巴士路線圖我同b都唔知點好, 唯有問動物園站既職員, 用著我一口流利既普通話問完點去, 搭咩巴士後, 行番去逐個站睇下邊個巴士站先去到深坑, 睇到第n個站既時候, 有個阿姨就叫著...

阿姨: 是在這裡啦!!!
t: 吓!!...
阿姨: 你們不是要去深坑嗎??
t: 是啊, 是這個車站嗎??
阿姨: 就是這囉, 我們幾個也去深坑, 在捷運站聽到你們都去, 本想叫你們一起走, 但是你們一下子就跑了, 喊也喊不停...
t: 啊..是噢, 謝謝你(點頭)...

同阿姨們三人吹水一番後, 知道佢同另一朋友由台南黎台北探朋友加觀光, 係台南做政府工, 又得知我地酒店錢平得用無可能黎形容, 重有我個樣似日本人(可能受我一副電波look影響, 有啲upset, 因為日本人個樣大多好似受過輻射咁, 講真日本有幾多個木村), 再繼續吹水...

阿姨: 你們要深坑做什麼???
t: 我們要去吃豆腐(傻笑)...
阿姨: 是噢, 我們也是, 呵呵呵呵....
t: 對啊, 今天整天也沒有食過東西, 現在餓死了...
阿姨: 啊, 我這裡有些小吃, 你拿去吧.
t: 吓...不用那麼客氣啦...

盛情難卻, 小食還是收下了, 邊坐車邊傾, 阿姨們重介紹左台北邊到好去, 帶左我地去食臭豆腐, 後黎就走走下唔見左人, 我地就繼續揾野食, 食左豆腐雪糕, 同牛奶公司果啲比真係好好多, 豆腐味好重好香, 又飲左杯冰涷竹庶水, 行左成日無乜飲水, 一杯竹庶水成個人番曬黎...後黎係街度又撞番阿姨們, 又吹水一番, 影左合照, 交換左聯絡方法後我地就正式分手, 出發離開深坑...黎深坑既時候無留意點番動物園, 見到有巴士經捷運木柵站就上左車, 搭番捷運番動物園站, 再行去貓空纜車...

到貓空纜車站, 星期日好多人啊, 條隊好長, 到龍尾時間係4:45pm, 想趕上貓空影日落似係不可能, 的確, 5:45pm先上倒纜車, 因為日落方向雲層太厚, 這個時間天空已變得金黃, 就只好係纜車內影相同欣賞日落...由地面上貓空大概用左20分鐘, 期間纜車有段急降同懸空高度令我有少少心寒, 由跌落去到地面應該要7-8秒時間吧...上到貓空已經係日落既尾聲, 就揾個高位爬上去影埋個尾...

天黑了, 無多留貓空一陣, 就坐巴士直接到市政府台北101去, 途中b就偷聽佢旁邊既情侶鬧交, 內容唔係咁重要, 當我坐底既時間, 男既扮落車衝向門口, 女既見係咁就死死地氣跟著, 怕被男既賴低係車度, 跟著男既問司機野後就坐低, 女既就低頭坐男既後面, 全程好明顯就係男既食著個女既, 我同b就開始討論, 題目都係圍繞著台灣男女同香港男女既分別, 台妹好正啊, 台男好台啊, 如果件事係香港發生男女角色可能會調轉啊, 港男無乜男子氣概啊種種話題...

兩個可憐單身港男既對話...
t: 你去救下佢啦...
b: 你唔去??
t: 台男都受過軍訓, 我唔夠佢打...
b: 哈哈...

七點幾去到市政府, 係台北101個mall度轉左一陣就揾到個觀光塔入口, 但發覺今晚俾人包左場, 上唔到去, 真係好想好似mr. bean咁揼地, 或係一個閃燈車埋去包場條pk度, 山長水遠黎到依度你同我講唔上得去, 憤怒之餘睇下重有咩值得睇, 買左個101鎖鑰扣後就揾下有咩野食, 黎到一間叫咖哩茄子既地方, 依餐算係我地黎台北後既第一餐正餐, 感覺好似LA既curry house咁, 還可以...飯後行過威秀影城, 撞到街上有狗表演玩搶飛碟, 尋回犬個樣真係好屈機, 搶到飛碟重識得企定定俾你影相, 十分醒目...走到誠品書店轉左一陣就打道回府...

回到酒店房, b查書發現阿姨俾我既小食要成NT50, 問我點解咁都要, 人地可能因為咁要捱餓..

幻想...
孩子們: 媽, 今晚吃什麼?
阿姨: 孩子們乖, 今天送了我們的晚飯給外地人, 今晚就先吃點樹葉吧...
孩子們哭著: 媽...
阿姨抱著孩子哭: 我的乖孩子...

我心一寒, 頭頂滴汗, 加陰影...另外b因為太倦決定明日同我分開行, 係我行得太過份???

End of day 2

台北1+1之旅 Day 1

以下故事係發生係2007.09.08

人物:
t: 咪就係我囉!
b: billyy

序...

決定了要離開香港的日期, 就plan走前要去邊度自由行, 台北會係一個對我黎講比較易既地方, 話曬都係第一次自由行...今次叫左b黎同我一齊去, 因為大家都未去過台灣, 最match依次我想盲摸摸咁去既旅行, 加上大家性格相近, 應該唔會太多衝突...

買機票同book酒店既責任唔小心推左俾b, 自己就去plan下要去邊, 得到衆人既意見加requirement, 決定搭港龍住天成, 但係我地book得太遲, 大部份旅行社都無曬啲 package, 拖到出發前一個禮拜都無著落, 但好彩b行過永安, 發現佢有d因為成唔到團而拆散賣既package, $21XX包機票三晚酒店, 重要平過住民宿, 雖然唔係我地想要既package, 坐中華住城美, 但價錢擊倒一切, 特別係我依種budget traveler...成交, 再辦埋台証, 自由行第一步完成...

Day 1(淡水, 士林夜市):

4:30am起身, 為的是要係8:00am機場度同永安claim番張機票, 帶左相機袋, tripod, 背囊, 行李一個, 其實可以唔洗帶咁多, 因為有一半係backup同醫療物資...與b相約在A12等, 睡一覺, 機場就到左眼前, 落車時間7:40am, 好perfect, 徐徐張行李搬落車, 到中華counter等機票, 等左一輪, 導遊先係8:30am出現, 作死, 遲半個鐘我可以睏多好多... 順利check-in, 過關, 到左登機入口又係等, 影下相, 同隔離個靚仔玩左一陣, 上機...值得留意, 中華啲機師轉出跑道時, 未出彎係apex位已經開始加速, 似乎佢地真係駕開戰機... 估佢唔到, 一個鐘機竟然有早餐食, 雖然一啲都唔好食, 係無味既蘿蔔膏同辣既史萊姆圓, 另外空姐重要sell duty-free, 佢地好忙啊...到埗後過關, 排左半個鐘, 依一刻發覺香港人做野既速度係全世界最快嫁, 行到埋去, 發覺佢地用指甲油掃黎加墨, 一下下油落去, 天啊!!!可唔可用快啲方便啲既方法加墨啊... 心中火都黎埋, 面上擺去笑容, 只係希望快啲過到關, 出左關, 換過台幣, 就有飛狗人員叫我地上車, 放好行李, 坐著便是等待, 電視播著吳宗憲的綜藝節目, 但好無聊, 可能只係我唔識欣賞, 我又睡著了...醒左既時候應該已到台北市, 坐多陣就到台北車站, 落車, 一袋二袋, 都唔知城美係邊, 就走入車站, 去到旅遊服務中心問, 大概知道方向同路徑就謝過了, 行左大概三十分鐘, 大汗淋漓, 終於行到, check-in, settle down, 發覺無聖經, 算, 可能唔興, 但廁所無水就麻煩啲啦, 求救後解釋係整緊水喉, 夜啲就有水, 冇問題, 整理裝備後出發, 台北1+1之旅正式開始...

第一站係淡水, 為的只是要食超高冰淇淋同影日落(一己私慾), 走到捷運西門站, 發覺原來條街叫視聽影音街...hoho, 住依條街認真唔錯...落捷運買悠遊卡, NT500, 用NT1000入機, 卡到手, 加十個NT50硬幣, 重到甩褲, 睇路線圖, 十分簡單, 方向路徑決定, 入閘, 轉車無問題, 車內繼續玩相機, 到埗大概只係4:30pm, 離日落重有一段時間, 就先物色利好位置, 然後就到處走走, 在街上都算多人, 店舖大都係賣食既同攤位遊戲, 當然係第一時間揾超高冰淇淋, 可能因為下晝無食野, 一食就兩杯, 跟著又周圍行, 周圍影, 又發現係香港同一現象, 因為dslr依家可以平過部dc, 多左好多人玩, 係淡水行下就見到幾部d40(就只見泥坑機), 當中重有情侶要我幫佢地影合照, 我相信大部份單反用家都唔係太想交自己部機俾陌生人影, 淨係基本操作已經不簡單了, 未用過的多數第一次也不會看viewfinder, 交部機俾陌生人還有點擔心呢, 今次有影友要我幫佢地影合照, 好像有點身份認同既感覺(飄飄然了), 影後大家又交換下心得, 兩陌路人因為某興趣相近而關係拉近, 感覺好奇妙啊...差唔多到magic hour, 就番去個靚位set腳架, 今次巧合地影左張老人與海, 自己幾鐘意影友都覺得唔錯, 另外我既影日落功夫還只是一般, 還需努力啊...影左好耐, magic完了, 我諗都悶死b, 都係快手收工揾野食, 但行左一陣, 食物都唔係太吸引, 就去下一站, 士林夜市...

到左士林夜市, 感覺人很多, 只能跟著人流走...一整日無野落肚, 之前食既冰淇淋大概俾太陽蒸發左, 有啲血糖偏低既現象, 都係快啲揾野食, 行下又睇下, 買野食既機會其實好少, 買左杯青蛙下蛋, 比想像中異常好飲, 加上快dehydrate既我, 真係救左我一命...又食左碗油飯跟蟹肉羹, 問下隔離阿叔啲野要點食法, 佢都好友善咁回答, 食著同b傾計, 談到台灣人的生活模式, 一家人到夜市食飯行街既都好多, NT100-200一家人已經可以撐著個肚行, 想著自己好似好耐無一家人坐低食飯...=.=, 努力揾錢吧. 又說到夜市店舖既經營模式好強烈, 當客人進入店入坐下, 店員問客人要什麼, 客人都唔洗太耐時間就知自己要咩野, 因為店內能食既五隻手指數得曬, 客人要諗既只係得果幾樣野, 簡單得很, 依種模式同香港好唔同, 如香港既茶餐廳, 你係可以食到任何國家既不同食物 但每次就要花時間去諗, 諗既時間長左變相turnover低左, 要high turnover既飲食業可能會輸係度, 另外廚師用既廚具都多好多, 成本就上漲了, 有choices係好, 但係多choices都唔係一件好事, 台灣既模式令個turnover好高, 廚具少, 成本就低, 賺到既自然更多了(說得太遠, 唔似遊記啦)...出番街外人更多, 只係你迫我我迫你, 你企係度後面既人就會推你行, 依種地方都係唔太想多留, 食少少就走...

還不是太夜, 就走到Chocozing飲朱古力, 店開在暗巷的地方, 用左啲時間去揾, 進店入環境唔錯, 很適合情侶黎=.=, 可惜係我隔離既係b, 我諗佢都有相同諗法, 兩個失戀少年要黎依到做乜啊...卸下裝備, 今日一身既電波少年造型, 再行左成日已經無乜力, 我諗係今日第一次真正坐低休息...坐低就有店員走黎介紹飲既食既, 解釋得幾清楚, 我跟b都叫左飲既, 可能都係唔太識欣賞朱古力, 感覺一般好飲, 價錢不菲, overall滿意啦...

一日行程已完, 番到酒店, 第一時間check下個廁所, b一沖廁, 一大盤墨汁般液體沖左出黎, 嚇死b, 沖多幾次, 無改善, 再試水龍頭, 都係墨汁, 花灑, 一樣, 仲彈到我一褲都係=.=...咁既情況下點會唔求救啊, 即打俾front desk, 回覆係叫你沖多陣水...啊啊啊啊啊啊啊啊啊, 平野真係無好, 見到啲咁既水, 今晚發惡夢都似, 狂沖水之餘, 同b講不如換房, 依個情況下b點會唔想換, 但係12點幾一間咁都會fully-book既酒店點會有房俾你, 於是決定聽日一定要換房...等水正常後就各自沖涼睏覺...

End of Day 1...

Day 1 就用左兩日去寫, 仲有三日, 點算...